شەهیدێ فەرماندە نایف موسا بۆسەلی، سالا ١٩٦٢ێ ل گوندێ بۆسەلێ ل ده‌ڤه‌را زاخۆ ھاتیە سەر دونیایێ، ل گوندێ بۆسەلێ خاندنا خوەیا سەرەتای ب دوماهی ئینایە و خاندنا خوەیا ناوەندی ل کومەلگەها بێرسڤی ب دوماهی ئینایە، بۆ درێژی پێدان ب خاندنا خوە قەستا باژێرێ زاخۆ کر و ل ئامادەیا پێشەسازیا زاخۆ خاندنا خوە ب دوماھی ئینا، ل سالا (١٩٨١-۱۹٨۲) د خواندنێدا دبیتە سەرکەفتیێ ئێکێ ل سەر ئاستێ پارێزگەھا دھۆکێ، ل سالا ١٩٨٨ شەهیدێ قارەمان دگەل خێزانا خوە ئاوارەی تورکیا دبن و ل کەمپا دیاربەکرێ ئاکنجی دبیت، پشتی سه‌رهه‌لدانا سالا ١٩٩١ دێ زڤریته‌ڤه بۆ خاكا نیشتمان، ل ٥ێ حوزەیرانا ١٩٩٨ ل چیایێ گابنێرکێ ل دەڤەرا کانی ماسی شەهید دبیت، ژ هەژیێ ئاماژە پێکرنێیە دگەل وێ چەندێ دا کو شەهید نایف بۆسەلی پێشمەرگە و فەرماندەکێ قارەمان بوو ھەروەسا هۆزانڤان و راگەهاندنکارەکێ سەرکەفتی بوویە، د هەمی هەلکەفت و بیرەوەریێن نەتەوەییدا رولەکێ بەرچاڤ هەبوو، هەروەسا دیوانەکا هوزانان ب ناڤێ( ژ دەردێن ئاوارەبوونێ) ل سالا ١٩٩٨ە چاپ و بەلاڤ کریە.
خهباتنامهشەهیدێ فەرماندە نایف موسا بۆسەلی، ل سالا ١٩٧٨ خوە دگەهینته ناڤ رێزێن رێکخستنێن نهێنی یێن پارتی دیموکراتی کوردستان و دبیتە کادرێ رێکخراوا ھیزل یا نھێنی و پاشان دبیتە بەرپرسێ رێکخراوا ئێلوول، ل سالا ١٩٨١ پەیوەندی ب رێزێن لەشکەرێ شۆرەشگێڕێ کوردستانێ دکەت ل سنوورێ لێژنا زاخۆ و دبیتە پێشمەرگە و هەر ل ڤێ سالێدا ھات ڤەگوھاستن بۆ بارەگایێ لقا ئێك و بۆ ماوێ سێ ھەیڤا دبیتە کادرەکێ سەرکەفتی ل بارەگایێ لقا ئێك، پاشی دھێتە ڤەگوھاستن بۆ بارەگایێ مەکتەبا سیاسیا پارتی ل راژان وەکو کادرێ بەشێ ئیدارێ، دناڤبەرا سالا (١٩٨٢-١٩٨٣) جارەکادی ھاتە ڤەگوھاستن بۆ لقا ئێك.
سالا ١٩٨٤ێ بوویە ئەندامێ (ل،ی،ق،ل،د) ل کومیتا دەڤەرا زاخۆ، پاشان ل سالا ١٩٨٥ دبیتە بەرپرسێ گومرکا زاویتە پاشان دبیتە بەرپرسێ گومرکا حەڤتەنینێ، پشتی ماوەیەکێ دبیتە کادرێ رێکخراوەکا لەشکەری، ل سالا ١٩٨٦ دھێتە ڤەگوھاستن بۆ رێکخراوا لەشکەریا عەین زالە.
ل دەمێ سەرھلدانا ١٩٩١ شه‌هید نایف مووسا د گەل هەڤالێن خوەیێن پێشمەرگه‌دا دەورەکێ پیرۆز و کاریگەر دبینت و پشتی سەرهلدانێ دبیتە کادرەکێ چالاک و ئەکتیڤێ حزبی ل دەڤەرا زاخۆ و د وی ماوەی دا چەندین پلە و پایەیێن بەرپرسایەتی ل سنوورێ لێژنێن زاخۆ، دەرکار، خەبات پێ دهێنە دان.
د دامەزاندن و دانانا دەزگەهێن شەرعی یێن حکومی و ئەمنی ل زاخۆ دا رولەکێ چالاک دبینت، ل دەمێ دانانا رێڤەبەریا ئاسایشا زاخۆ دبیتە ئەفسەر ل رێڤەبەریا ئاسایشا زاخۆ و پاشان دبیتە جێگرێ رێڤەبەرێ ئاسایشا زاخۆ هەتا سالا ١٩٩٥بەردەوام بوویە، ل سالا ١٩٩٦ بوویە جێگرێ بەرپرسێ لێژنا عەسکەری ل زاخۆ.
ل سالا ١٩٩٧ بوویە فەرماندێ بەتالیونا خابور یا پارتیزانی ل زاخۆ، پاشان بوویە فەرماندێ بەتالیونا ئێک یا سەر ب سوپایێ ١٤ ڤە ل زاخۆ، شەهید ل سالا ١٩٩٧ بەژداری د خولەکا لەشکەری ل کولیژا لەشکەریا زاخۆ دا دکەت و ڤێ خولێ دا دبیتە سەرکەفتیێ ئێکێ ل سەر هەموو فەرماندێ بەژدار دڤێ خولێدا، ھەروەسا شەهیدێ نایف بوسلی د ھەمی بزاڤ و چالاکیێت لەشکەری دا رولەکێ چالاک و مەزن دبینت، ل ١٥ێ حوزەیرانا ١٩٩٨ ل چیایێ گابنێرکێ ل دەڤەرا کانی ماسی ل شەڕەکێ گراندا شەهیدێ فەرماندە بەرسینگێ تیرۆریستان دگریت و دڤی شەڕیدا شەهید دبیت.
سەرچاوە:ئەرشیفی دەستەی ئینسکلۆپیدیای پارتی پارتی دیموکراتی کوردستان.